თბილისი, 30 ივნისი — Sputnik. გერმანიის საგარეო საქმეთა მინისტრი, ეუთოს მოქმედი თავმჯდომარე ფრანკ-ვალტერ შტაინმაიერი თბილისში 1 ივლისს ჩამოვა და მონაწილეობას მიიღებს ეუთოს საპარლამენტო ასამბლეის ყოველწლიურ სესიაში.
სესია საქართველოში პირველად იმართება. ღონისძიებას, რომელიც თბილისში 1–5 ივლისს ჩატარდება, 57 ქვეყნიდან 700-ზე მეტი დელეგატი დაესწრება. ისინი გლობალური მიგრაციის, ეკონომიკური თანამშრომლობის, უსაფრთხოებისა და ადამიანის უფლებების სფეროში გამოწვევების შესახებ იმსჯელებენ.
ვიზიტის მსვლელობისას გერმანიის საგარეო საქმეთა მინისტრი უნდა შეხვდეს საქართველოს პრეზიდენტს გიორგი მარგველაშვილს, პრემიერ-მინისტრს გიორგი კვირიკაშვილს, საგარეო საქმეთა მინისტრს მიხეილ ჯანელიძესა და პარლამენტის თავმჯდომარეს დავით უსუფაშვილს.
გარდა ამისა, შტაინმაიერი მონაწილეობას მიიღებს გერმანელი ბიზნესმენებისთვის გამართულ მრგვალ მაგიდაში.
საქართველოში ვიზიტის დასრულების შემდეგ შტაინმაიერი ეწვევა სომხეთსა და აზერბაიჯანს, სადაც მთიანი ყარაბაღის კონფლიქტის მოგვარების საკითხს განიხილავს.
