თბილისი, 24 აგვისტო — Sputnik. საქართველოს პრემიერ-მინისტრმა გიორგი კვირიკაშვილმა საგარეო საქმეთა სამინისტროს დაავალა, გამოარკვიოს, რით შეუძლია საქართველოს იტალიის დახმარება დამანგრეველი მიწისძვრის შემდეგ, რომელიც ქვეყნის ცენტრალურ ნაწილში მოხდა.
ევროპის სეისმოლოგიურმა ცენტრმა (EMSC) განაცხადა, რომ იტალიის ცენტრალურ ნაწილში 6,1 მაგნიტუდის მიწისძვრა მოხდა. აშშ-ის გეოლოგიური სამსახურის (USGS) ინფორმაციით, მიწისძვრის მაგნიტუდამ 6,2 ბალი შეადგინა. ბოლო მონაცემებით, მიწისძვრას 24 ადამიანი ემსხვერპლა. სეისმოლოგები ახალ ბიძგებს არ გამორიცხავენ.
„სამძიმარს ვუცხადებ იტალიის მთავრობას და იტალიელ ხალხს ამ ტრაგიკული ფაქტის გამო. მინდა საგარეო საქმეთა მინისტრს ვთხოვო, სასწრაფოდ დაამყაროს კომუნიკაცია იტალიასთან, რათა დახმარების გაწევის პროცესში საქართველომაც მიიღოს მოკრძალებული წვლილი“, — განაცხადა პრემიერმა.
მანამდე საგარეო საქმეთა სამინისტრომ განაცხადა, რომ იტალიაში მიწისძვრის მიზეზით დაშავებულთა და დაღუპულთა შორის საქართველოს მოქალაქეები არ არიან.
