თბილისი, 10 ოქტომბერი — Sputnik. მოსკოველი მოდის მიმდევრები და ქართული სტილის მოყვარულები ქართველი დიზაინერების კოლექციას 15-16 ოქტომბერს გაეცნობიან, იუწყებიან ღონისძიების ორგანიზატორები.
„მოსკოვში პირველად ჩამოვლენ ცნობილი ქართველი დიზაინერები და შემოდგომა-ზამთარი 2017-ის ექსკლუზიურ კოლექციას წარმოადგენენ. ჩვენების მარგალიტი — ეროვნული კოლორიტით გაჟღენთილი, ფერთა სიუხვით გაჯერებული, ელვარე სტილის უნიკალური ხელნაკეთი ნამუშევრებია“, — ნათქვამი ორგანიზატორთა განცხადებაში.
მოსკოვში მიემგზავრებიან: თინათინ მაღალაშვილი — pret-a-porte სამოსით, ეკა ჯავახიშვილი — ეროვნული კოსტიუმის სტილში შესრულებული სამოსით, მაია მიქაშავიძე — თავისი უნიკალური სამკაულებით, ეკა ბუზალაძე — საქმიანი და casual სტილის სამოსით, მადონა ხარატიშვილი — უჩვეულო ფეხსაცმელებით.
ღონისძიების ორგანიზატორია რუსეთში მოღვაწე წარმოშობით ქართველი ბიზნესმენი ქალბატონი ნადეჟდა მოწონელი.
„რაც მეტი ქვეყანა გაეცნობა ქართველი დიზაინერების პროდუქციას, მით უკეთესი ჩვენთვის. მომავალში ვაპირებთ უფრო ხშირად გავმართოთ შოუ-რუმები მოსკოვში და ჩავრთოთ ამაში რაც შეიძლება მეტი ქართველი დიზაინერი“, — განუცხადა Sputnik-ს დიზაინერმა თინათინ მაღალაშვილმა.
მისი თქმით, რუსეთის გარდა ქართველი დიზაინერების შოუ-რუმების გამართვის თაობაზე მოლაპარაკებები სხვა ქვეყნებთანაც მიმდინარეობს.
