საქართველოს პარლამენტის წევრის გივი თარგამაძის ავტომობილი სამშაბათს, საღამოს ყოფილ კოლმეურნეობის მოედანზე, ოპოზიციური პარტია „ერთიანი ნაციონალური მოძრაობის“ ოფისთან ახლოს აფეთქდა.
ავტომობილში აფეთქების დროს იმყოფებოდნენ თარგამაძე და მისი მძღოლი. მათ მსუბუქი დაზიანებები მიიღეს, რამდენიმე გამვლელი კი სერიოზულად დაშავდა — ხუთი ადამიანი საავადმყოფოში გადაიყვანეს.
შსს-მ მომხდარ ფაქტთან დაკავშირებით საქმე აღძრა „დამამძიმებელ გარემოებებში განზრახ მკვლელობის მცდელობის“ მუხლით. შემთხვევის ადგილზე დაახლოებით ხუთი საათის განმავლობაში კრიმინალისტების რამდენიმე ჯგუფი მუშაობდა.
თარგამაძემ და მისმა მომხრეებმა მომხდარ ფაქტში მმართველი პარტია „ქართული ოცნება“ დაადანაშაულეს. ამავე დროს, საქართველოდ პრემიერმა გიორგი კვირიკაშვილმა, რომელიც საპარლამენტო არჩევნებში მმართველი პარტიის საარჩევნო სიის პირველი ნომერია, განაცხადა, რომ აფეთქება განახორციელეს იმათ, ვისაც არეულობა სურს და მშვიდი საარჩევნო გარემო არ აწყობს.
აფეთქება საპარლამენტო არჩევნებამდე 3 დღით ადრე და „ნაცმოძრაობის“ მიერ დაგეგმილი მიტინგის წინა დღეს მოხდა.
