თბილისი, 5 ნოემბერი — Sputnik. თბილისში Mercedes Benz Fashion Week–ის მეორე სეზონი იწყება, სადაც სამოსის კოლექციებს ოცზე მეტი ქართველი და უცხოელი დიზაინერი წარადგენს, — იუწყებიან ორგანიზატორები.
მოდის კვირეული ზურაბ წერეთლის თანამედროვე ხელოვნების მუზეუმში 5 ნოემბერს დაიწყება და 9 ნოემბრამდე გასტანს. კვირეულს დაესწრებიან ბაიერები, მოდის კრიტიკოსები, ფოტოგრაფები და მედიის წარმომადგენლები სხვადასხვა ქვეყნებიდან.
Mercedes Benz Fashion Week–ის ხელმძღვანელი საქართველოში ტრადიციულად გახლავთ ახალგაზრდა ფეშენ–დიზაინერების კონკურსის BE NEXT დამფუძნებელი სოფო ჭყონია.
წელს ღონისძიებას დაესწრებიან ამერიკული „ვოგის“ წარმომადგენლები, მოდის ცნობილი კონსულტანტი და კასთინგ–აგენტი ნატალი (Natalie Joos) ნიუ–იორკიდან და ასევე ფილიპინური წარმომავლობის პოპულარული ფეშენ–ბლოგერი ბრაიან გრეი იამბაო (Bryan Grey Yambao), რომელიც უფრო ბრაიან ბოის სახელითაა ცნობილი.
ქართველი დიზაინერების მიერ მოდის კვირეულზე პირველად წარმოდგენილი კოლექციების ნახვა და შეძენა წლის ბოლომდე შესაძლებელი იქნება სავაჭრო–გასართობ ცენტრში „თბილისი მოლი“.
Mercedes-Benz Fashion Week — ეს საერთაშორისო მოდის კვირეულების სერიაა, რომელიც კომპანია „მერსედეს–ბენცის“ მიერაა ორგანიზებული. ის ყოველწლიურად ტარდება სხვადასხვა ქვეყანაში, რომელთა შორისაა გერმანია, რუსეთი, აშშ, თურქეთი, ავსტრალია და სხვები.