თბილისი, 5 დეკემბერი – Sputnik. „Sputnik საქართველოს“ მკითხველებმა საბავშვო „ევროვიზიის“ გასამართად ადგილი შეარჩიეს — გამოკითხვის შედეგების თანახმად, მკითხველთა დიდმა ნაწილმა არჩევანი Black Sea Arena-ზე შეაჩერა.
ქართველი შემსრულებელი მარიამ მამადაშვილი საერთაშორისო ვოკალური კონკურსის – საბავშვო „ევროვიზიის“ გამარჯვებული გახდა. თუმცა, განსხვავებით უფროსების „ევროვიზიისგან“, გამარჯვებული ქვეყანა მომავალ წელს კონკურსის გამართვის უფლებას ავტომატურად არ იღებს. საბოლოო გადაწყვეტილებას ევროპის მაუწყებელთა კავშირი მიიღებს, რომელიც ამ საკითხს უახლოეს მომავალში განიხილავს.
Black Sea Arena-ს საკონცერტო დარბაზში „ევროვიზიის“ გამართვას ხმა გამოკითხვაში მონაწილეთა 40%-მა მისცა. ხოლო 33,3% კი მიიჩნევს, რომ ასეთი მასშტაბის კონკურსის ორგანიზებისთვის უმჯობესია ახალი შენობა აშენდეს.
თბილისის საკონცერტო დარბაზის (ფილარმონია) სასარგებლოდ საკუთარი პოზიცია მკითხველთა 10%-მა დააფიქსირა, ასეთივე პროცენტული მაჩვენებელი ერგო სპორტის სასახლესაც.
საბავშვო „ევროვიზიის“ „დინამო არენაზე“ გამართვა მისაღებია გამოკითხვაში მონაწილეთა 3,3%-სთვის. კითხვაზე, „საქართველოში სად შეიძლება საბავშვო „ევროვიზიის“ გამართვა?“ პასუხის გაცემა რესპოდენტთა 3,3%-ს გაუჭირდა.
საკონცერტო დარბაზი Black sea arena საქართველოს ყოფილი პრემიერ-მინისტრის ბიძინა ივანიშვილის ფონდი „ქართუს“ მიერ აშენდა, რომელიც სახელმწიფოს გადაეცა. საკონცერტო დარბაზთან ერთად სახელმწიფომ საჩუქრად მიიღო 2016 წლის სექტემბრამდე გაწერილი მსოფლიოს და საქართველოს ვარსკვლავების მონაწილეობით შედგენილი კულტურული პროგრამა, რომელიც ფონდმა „ქართუმ“ დააფინანსა.
ფონდმა „ქართუმ“ საკონცერტო დარბაზის მშენებლობაში 200 მლნ ლარის ინვესტიცია განახორციელა, მთლიანობაში აღნიშნული პროექტი ფონდს 110-115 მლნ აშშ დოლარი დაუჯდა.
გასულ წელს Black Sea Arena-ს სცენაზე გამოვიდნენ მსოფლიო ვარსკვლავები კრისტინა აგილერა, ვანესა მეი, ჯგუფი Scorpions. ასევე გაიმართა გრანდიოზული ღონისძიებები – საერთაშორისო ფოლკლორული ფესტივალი და ბრძოლა წესების გარეშე.
2017 წლის მაისში საკონცერტო დარბაზი ლეგენდარულ Aerosmith-ს უმასპინძლებს.