თბილისი, 24 ნოემბერი– Sputnik. თბილისის ჩასაბერ საკრავთა ფესტივალი, რომელიც საქართველოს დედაქალაქში 29 ნოემბრიდან 2 დეკემბრის ჩათვლით გაიმართება, ევროპის სხვადასხვა ქვეყნის მუსიკოსებს შეკრებს.
ფესტივალში მონაწილეობას მიიღებენ ფრანგი ვალტორნისტი ერვე ჟულანი და ჰობოისტი სელინ მონე, ლონდონელი ფაგოტისტი ემა ჰარმანი, იტალიელი კლარნეტისტი პაოლო ბელტრამინი, პოლონელი ფლეიტისტი აგატა იგრასი და კვარტეტი ჰოლანდიიდან Ruysdael.
ღონისძიების ფარგლებში თბილისის ვანო სარაჯიშვილის სახელობის სახელმწიფო კონსერვატორიასა და „თი-ბი-სი გალერეაში“ ოთხი კონცერტი გაიმართება. საღამოზე აჟღერდება მოცარტის, ბეთჰოვენის, ვაგნერის, შტრაუსის, მალერისა და სხვა ცნობილი კომპოზიტორების მუსიკა, იუწყებიან ორგანიზატორები.
ტრადიციის მიხედვით, ფესტივალის ყველა მონაწილე კონსერვატორიის სტუდენტებისთვის პროფესიონალურ მასტერ-კლასებს ჩაატარებს.
თბილისის ჩასაბერ საკრავთა ფესტივალი 2009 წელს დაფუძნდა და მას, ქართველი მსმენელისთვის მსოფლიო კლასიკური მუსიკის შედევრების გაცნობასთან ერთად, საგანმანათლებლო დატვირთვაც აქვს.
ფესტივალის მონაწილეები სპეციალურად კონსერვატორიისა და სამუსიკო სკოლების მოსწავლეებისთვის მასტერ-კლასებს ატარებენ.