თბილისი, 8 ოქტომბერი — Sputnik. არჩევნების დღეს დილიდან დაფიქსირდა საარჩევნო დოკუმენტაციის არასათანადო წარმოების 7, საკონტროლო ფურცლის არასათანადო შევსების 5, დამკვირვებლის უფლების შეზღუდვის 2, უბანზე აგიტაციის 1, საარჩევნო უბანზე არაუფლებამოსილი პირების ყოფნის 2 შემთხვევა, აცხადებს არასამთავრობო ორგანიზაცია „სამართლიანი არჩევნების“ ხელმძღვანელი მიხეილ ბენიძე.
მისი თქმით, საარჩევნო უბნების გახსნისა და მოწყობის პროცესმა არსებითი ხასიათის დარღვევების გარეშე ჩაიარა, თუმცა პირველი ამომრჩევლის მისაღებად დილის 8 საათისთვის მზად არ იყო საარჩევნო უბნების 4.2%.
დილის 10 საათისთვის ამომრჩევლის აქტიურობამ 8,34% შეადგინა. ამ მომენტისთვის არასამთავრობო ორგანიზაციების ცხრაასზე მეტმა დამკვირვებელმა საარჩევნო პროცესში 19 დარღვევა გამოავლინა — როგორც ხმის მიცემის პროცესის მომზადებისას, ისე მის შემდეგაც.
„პირველი ამომრჩევლის მისაღებად 8 საათისთვის მზად არ იყო საარჩევნო უბნების 4,2% მთელი საქართველოს მასშტაბით, მაშინ, როდესაც 2012 წელს მზად არ იყო უბნების 8,8%, ხოლო 2014 წელს ეს მაჩვენებელი 1,3% იყო“, — განაცხადა ბენიძემ.
„სამართლიანი არჩევნების“ სადამკვირვებლო მისიის მიერ დაფიქსირებული დარღვევები ასე გამოიყურება:
• 41-ე მაჟორიტარული ოლქი, გორი — 96-ე საარჩევნო უბანზე დამკვირვებლის უფლების შეზღუდვა;
• საგარეჯოს 23-ე მაჟორიტარული ოლქი, მე-5 საარჩევნო უბანი — 7-8 საათამდე საერთაშორისო დამკვირვებლები უბნის გახსნის პროცედურებზე დასასწრებად საარჩევნო კომიასმ არ დაუშვა;
• მარნეული, 36-ე მაჟორიტარული ოლქის მე-5 უბანი — საკონტროლო ფურცლის შევსების პროცედურებთან დაკავშირებით ხარვეზები;
• ქუთაისის 49 მაჟორიტარულ ოლქის 70-ე უბანი — ამომრჩევლის ნაცვლად დამკვირვებლის მონაცემები შეიტანეს საკონტროლო ფურცელში;
• ბათუმის 70-ე ოლქის 58-ე საარჩევნო უბანი — საკონტროლო ფურცლის არასათანადო შევსების გამო საარჩევნო უბანი ნახევარი საათის დაგვიანებით გაიხსნა;
• მარნეულის 36-ე ოლქის მე-5 საარჩევნო უბანი — საკონტროლო ფურცელი ყუთში პროცედურის დარღვევით ჩააგდეს;
• მარნეულის 35-ე ოლქის მე-14 საარჩევნო უბანი — გადასატან და საარჩევნო ყუთში საკონტროლო ფურცელი არ იყო მოთავსებული.
