თბილისი, 30 აგვისტო — Sputnik. ინვესტიციების მოცულობა, რაც აჭარაში კერძო სექტორში განხორციელდა, 2016 წლის 6 თვის მონაცემებით, წინა წლის ანალოგიურ მაჩვენებელთან შედარებით, 26%-ით გაიზარდა და 208,1 მლნ აშშ დოლარი შეადგინა, ნათქვამია აჭარის ფინანსთა და ეკონომიკის სამინისტროს განცხადებაში.
საერთო მოცულობიდან 154,2 მლნ დოლარი უცხოური, ხოლო 53,9 მლნ დოლარი ადგილობრივი კერძო ინვესტიციაა.
ინვესტიციების საერთო მოცულობის 49,5% ენერგეტიკაზე მოდის, ტურიზმზე – 30,1%, მშენებლობის სფეროზე — 18,4%, ხოლო სხვა დარგებზე – 2%.
2015 წელს კერძო ინვესტიციების მოცულობამ 366 მლნ აშშ დოლარი შეადგინა, რაც 141%-ით მეტია 2012 წლის მონაცემთან შედარებით, 88%-ით მეტია 2013 წელთან და 33%-ით მეტია 2014 წლის მაჩვენებელთან შედარებით. უცხოური ინვესტიციების მოცულობამ 2015 წელს 278,5 მლნ აშშ დოლარი შეადგინა, რაც 372%-ით მეტია 2012 წლის მონაცემთან შედარებით, 306%-ით მეტია 2013 წელთან და დაახლოებით 53%-ით მეტია 2014 წლის მაჩვენებელთან შედარებით, განაცხადა აჭარის ფინანსთა მინისტრმა.
