თბილისი, 22 აგვისტო — Sputnik. ქართული და მსოფლიო მუსიკის ვარსკვლავების ქანდაკებები ამშვენებს „მუსიკოსთა პარკს“, რომელიც ურეკში საკონცერტო დარბაზ Black Sea Arena-ს გვერდით გაიხსნა.
ეს პარკი ფონდ „ქართუს“ მორიგი საჩუქარია სახელმწიფოსთვის. კერძოდ, პარკი ოფიციალურად გადაეცა ოზურგეთის მუნიციპალიტეტს.
როგორც ორგანიზატორებმა ჟურნალისტებს უთხრეს, თავდაპირველად იყო იდეა საკონცერტო დარბაზის გვერდით დასასვენებელი და სასეირნო ადგილი მოეწყოთ. მოგვიანებით კი გაჩნდა იდეა „მუსიკოსთა პარკის“ შექმნის შესახებ.
„ეს არის მსოფლიოში უნიკალური პრეცედენტი, სადაც დაიდგა არა მარტო ცნობილი მუსიკოსების ქანდაკებები, არამედ სპეციალური მოწყობილობების დახმარებით მოხდა მათი კომპოზიციების ჩაწერა. დამთვალიერებელს მიეცა საშუალება არა მხოლოდ დაისვენოს ამ სასიამოვნო ხეების ჩრდილში, არამედ მოისმინოს აღნიშნული მუსიკოსების ცნობილი მელოდიები“, — თქვა ჩხეტიანმა.
ამჟამად „მუსიკოსთა პარკში“ უკვე დადგმულია ბი–ბი კინგის, რეი ჩარლზის, ელვის პრესლის, ფრენკ სინატრას, მაიკლ ჯექსონის, უიტნი ჰიუსტონის, ელტონ ჯონის, ედიტ პიაფის, ლუჩანო პავაროტის, ლუი არმსტრონგის, სტივ უანდერის, ბარი უაიტის ქანდაკებები.
ქართველ მუსიკოსთაგან პარკს ამშვენებს ზაქარია ფალიაშვილის, ჯანსუღ კახიძის, რევაზ ლაღიძის, ფილიმონ ქორიძის, ვანო მჭედლიშვილის, ვახტანგ ჭაბუკიანის, ევგენი მიქელაძის, ზურაბ ანჯაფარიძის, დიმიტრი აფაქიშვილის, ვიქტორ დოლიძის, ვანო სარაჯიშვილის სკულპტურები.
როგორც იდეის ავტორებმა აღნიშნეს, წლის ბოლომდე „მუსიკოსთა პარკში“ გამოჩნდება ჯორჯ ბალანჩინის, ჰამლეტ გონაშვილის, ჯეიმს ბრაუნის, ბობ მარლის, მაილს დევისის, „ბითლზის“, „თუფაქის“, მოცარტის, ბეთჰოვენის, ბახის ქანდაკებები. ასევე პარკში დაიდებენ ბინას ნინო და ილიკო სუხიშვილის, სანდრო კავსაძის, ძუკუ ლოლუას და სამუელ ჩავლეიშვილის სკულპტურები.
„მუსიკოსთა პარკის“ გახსნას ესწრებოდა საქართველოს კულტურისა და ძეგლთა დაცვის მინისტრი, რომლის თქმითაც, პარკს უნიკალური კონცეფცია აქვს. ხოლო მისი გაჩენის ფაქტი სტიმული უნდა გახდეს რეგიონში ტურიზმის გაზრდისა და განვითარებისთვის.
